فى الأول انا عايز اعرض 4 مشاهد مهمة وهى
مشهد1
نبيل لوقا بباوى متحدثا رسميا للحزب الواطى يعلن عن تخلص الحزب من القيادات الفاسدة و أن الحزب سوف يتخلي عن كل المقار غير المملوكة له أو المؤجرة بعقود وأنه سيتم التفاوض مع ملاك هذه المقار لإمكانية تجديدها بعد انتهاء مدة الإيجار بما يسمح باستمرار الحزب فيها.وان الحزب يمجد ثورة 25 يناير ومحاربتها للفساد (واخد بالك انت الفساد اللى الحزب الواطى كان السبب فية بيمجد الثورة اللى قضت ع الفساد دة ..يا مزاجو العالى ) طيب الانأح من كد ان بلبل لا فض فوووة اعلن كد بالفم المليان ومن غير كسوف ان الحزب الواطى يوافق على التعديلات الدستورية وانة بيجهز نفسة للانتخابات البرلمانية القادمة من خلال قوائمة الجديدة
مشهد 2
د.عصام العريان، عضو مكتب الإرشاد لجماعة الإخوان المسلمين والمتحدث الإعلامي باسم الجماعة، أن الموافقة على التعديلات الدستورية هي الطريق الأمثل إلى الدستور الجديد الذي ينادي به الجميع، مشيرًا إلى أن تلك التعديلات وإن كانت غير كافية فإنها تلزم بسن دستور جديد، ولا يمكن إلغاء هذا الإلزام إلا بالشعب
مشهد 3
خروج القيادى البارز للجماعة الاسلامية ( على فكرة الجماعة الاسلامية دى غير جماعة الاخوان علشان فية لبس كبير قوى فى الموضوع دة ) ويستقبل استقبال تاريخى من الاعلام و كأنة الظاهر بيبرس او صلاح الدين الأيوبى والمشكلة ان الناس بتسأل قاتل الرئيس السادات عن خطتة السياسية يعلن إن التعديلات الدستورية المقترحة جيدة وتكفى فى المرحلة الحالية، لأن الوقت لا يسمح بوضع دستور جديد والمصيبة ان فية ناس بترشحة انة يبقى رئيس مصر القادم بالصلاة على رسول اللة
مشهد 4
يعلن الشخصيات المحترمة العامة رفضهم للدستور المرقع و اصرارهم على ان الدستور يسقط بسقوط النظام ومنهم مع حفظ الألقاب عمرو موسى -محمد البرادعى - حسن نافعة - هشام البسطويسى - أيمن نور - عمرو خالد - عمرو حمزاوى -ابراهيم عيسى _حمدى قنديل-نجيب ساويرس - عمرو الشوبكى -محمد ابو الغار - جورج اسحاق -عبد الحليم قنديل - محمد حسنين هيكل
طيب اية هى المشاكل الموجودة فى التعديلات الدستورية ؟
انا حأقول رأيى الشخصى بعد المشاهد الأربعة المهمة واللى فيها حاجات فى منتهى الخطورة زى المشهد الثالث وحابدأ من الأقل أهمية الى الاكثر أهمية
مادة76
ينتخب رئيس الجمهورية عن طريق الإقتراع السرى العام المباشر.ويلزم لقبول الترشيح لرئاسة الجمهورية أن يؤيد المتقدم للترشح ثلاثون عضوا على الأقل من الأعضاء المنتخبين لمجلسى الشعب أو الشورى ، أو أن يحصل المرشح على تأييد مالايقل عن ثلاثين ألف مواطن ممن لهم حق الإنتخاب فى خمس عشرة محافظة على الأقل ، بحيث لايقل عدد المؤيدين فى أى من تلك المحافظات عن ألف مؤيد.
وفى جميع الأحوال لايجوز أن يكون التأييد لأكثر من مرشح ، وينظم القانون الإجراءات الخاصة بذلك كله
ولكل حزب من الأحزاب السياسية التى حصل أعضاؤها على مقعد على الأقل بطريق الإنتخاب فى أى من مجلسى الشعب والشورى فى آخر إنتخابات أن يرشح أحد أعضائه لرئاسة الجمهورية.
دة معناة ان الحزب الواطى اللى عايز يقول نعم علشان كمان شهرين نعمل انتخابات مجلس الشعب كدة فى السريع والناس ماعندهاش اى وعى سياسى وهما معاهم الفلوس ( بتاعت الشعب طبعا ) ويبدأوا كالعادة فى شراء اصوات الغلابة اللى فى عرض 20 جنية او كيلو لحمة مشفى واهى مش فارقة معاهم نعم او لا ويكون المجلس طريق الحزب الواطى للرئاسة واللة ما هو بعيد نلاقى ننوس عين مامتة قائد ثورة التحديث بالحزب هو مرشح الحزب ومحدش يقدر يفتح بقة ما كلة ماشى بالديموقراطية
مادة 75
يشترط فيمن ينتخب رئيسا للجمهورية أن يكون مصريا من أبوين مصريين ، وأن يكون متمتعا بحقوقه المدنية والسياسية ، وألا يكون قد حصل أو أى من والديه على جنسية دولة أخرى ، وألا يكون متزوجا من غير مصرية ، وألا يقل سنه عن أربعين سنة ميلادية.
ودة فى رأييى فية اجحاف وتعسف واتهام بعدم الوطنية لناس كتير بتحب مصر اكتر ممن افسدو فيها ليهم ولاولادهم من بعدهم
المادة 189
فقرة أخيرة مضافة :
ولكل من رئيس الجمهورية ، وبعد موافقة مجلس الوزراء ، ولنصف أعضاء مجلسى الشعب والشورى طلب إصدار دستور جديد ، وتتولى جمعية تأسيسية من مائة عضو ، ينتخبهم أغلبية أعضاء المجلسين من غير المعيني فى إجتماع مشترك ، إعداد مشروع الدستور فى موعد غايته ستة أشهر من تاريخ تشكيلها ، ويعرض رئيس الجمهورية المشروع ، خلال خمس عشرة يوما من إعداده ، على الشعب لإستفتائه فى شأنه ، ويعمل بالدستور من تاريخ إعلان موافقة الشعب عليه فى الإستفتاء .
هذا معناه إن الفترة قبل تشكيل دستور جديد قد تمتد ل-6 شهور أو أكثر، وفي خلال هذه الفترة، هيبقى بيحكمنا رئيس - طبقاً للدستور القديم – لديه صلاحيات الألهة، وأنا مهما كان الرئيس المنتخب محترم و نزيه، ضميري يمنعني من الثقة العمياء في أي شخص أي كان ( معلش اللى اتلسع من الشوربة ينفخ فى الزبادى ) إذا أعطى هذا الكم الهائل من الصلاحيات، اللي تمكن أي شخص خبيث من التلاعب بكل وأي شئ.
وبعدين النص مافيهوش اى الزام للرئيس المنتخب بتعديل الدستور والمجلس المنتخب البرلمانى انا بارفض انى احط رقبتى تحت سيفة ويا عالم لو اتعملت الانتخابات بالسرعة دى ان ييجى مجلس الشعب اللى بيمثل الشعب فعلا وخصوصا بعد المشاهد ال 4 السابق عرضها
طيب ما هو المطلوب
احنا مش عايزين نستعجل لاننا زى البيبى فى كى جى وان سياسة اللى لسة بيزحف وعايز يتعلم يعنى اية سياسة اللى كانت قبل كدة لما نجيب سيرتها نقول والعياذ باللة زى ما بنقول ع الخمر والميسر وزى لما بتعلمة السباحة ولازم تفضل ماسك ايدة لحد ما يتعلم والا حيغرق
يعنى اتمنى ان يتم تعيين مجلس رئاسى مدنى ولا مانع من وجود فرد عسكرى وما اكثر الشخصيات القادرة ع الانضمام لهذا المجلس ليتولى ادارة شئون البلاد لفترة انتقالية عام او اكثر ولا مانع ان تمتد لعامين على الاكثر يتم خلالها اعداد دستور جديد وتظبيط الحياة السياسية واعتقد ان الحكومة الحالية برئاسة الدكتور عصام شرف قادرة تماما على توفير الاستقرار السياسى والاقتصادى اللى مش حييجى فى يوم ليلة لو قولنا نعم
وبعدين الفترة دى حتفرز قيادات سياسية وتكون كافية للقضاء على باقى عناصر الفساد تماما واستئصالة من الحياة السياسية قبل اى انتخابات رئاسية او برلمانية انا بأكد ان لو استعجلنا فيها حتكون لسة ملغوصة بفساد مش بالساهل نقضى علية تماما
انا بس حبيت اوضح وجهة نظرى الشخصية عشان الناس اللى بتتهمنا اننا لما نقول لأ حنوقف عجلة التنمية فى البلد وأقول هى فين التنمية دى اللى بقالنا30 سنة عمرنا ما شفناها وبعدين نرفع رقبتنا لفوق ونبص بعيد مش مشكلة لو اتكعبلنا ودوسنا على شوية ازاز حنتعور وبعد كدة حنوصل للاحنا عايزينة ونداوى الجروح البسيطة احسن ما نبص تحت رجلينا و نفادى شوية طوب و ازاز عبيط ولما نرفع عنينا نلاقى قدامنا ورم خبيث ما صدقنا اننا كنا اتخلصنا منة ونرجع اسوأ من الاول
اللهم احفظ بلادنا
15 مارس