حبيبتى مصر
بعد الحب والتحية وحشتينى يا غالية وحشتنى شوارعك وحواريكى وحشتنى دروبك وحشنى فرحك فى عز عتمة لياليكى وحشنى الحزن والكرب اللى اترسم فى عيون اهاليكى وحشنى مية نيلك اللى متلوثة بغبرة بلانا بيها اللى سرقوكى ونهبوا كل خيرك وسابولنا فقرك وكربك وهمك وضلمة ليالكى.
حبيبتى مصر ... مش عارف انتى فاكرانى واللا ناسيانى ...فاكرة دمى اللى سال علشان يروى اراضيكى .. فاكرة اشلاء جسمى اللى ادهست تحت عجل الجبروت والطغيان اللى عشش حواليكى... خايف اكون اتنسيت وبقيت مجرد صورة بهتانة ليا انا واصحابى متعلقة فى مرايات العربيات والشمس كلتها وخلتها مجرد سراب .. خايف اكون مجرد دماء راحت هدر علشانك وعلشان ولادى ..ولادى أدم وسلمى اللى كنت باحلم انهم يشوفوا ايام اجمل من اللى شوفناها.. ويعيشوا احلام سالت دمانا عشان نحياها .
برضة حافكرك بيا رغم انى متأكد انك عمرك ما نسيتينى ولا حتنسينى .. أنا ابنك .. شارب من مية نيلك.. وشى متمرغ فى تراب اراضيكى .. دمى سال عشان دمك يجرى فى عروقك .. أنا يا مصر .. يا أمى شهيدك
أنا .... أحمد بسيونى
حبيبتى مصر انا رسام كان عندى 31 سنة حبيت بريشتى ارسم ليكى احلام جميلة ... والون اللى جاى من تاريخك بلون اخضر جميل يفتكرة ولادى ويعيش فى خيرة احفادى ... خدت الماجستير من كلية التربية الفنية بجامعة حلوان واشتغلت مدرس مساعد فى قسم الرسم والتصوير فى جامعة حلوان .. كان نفسى الفن يكون مفهوم وبسيط عند كل طبقات الشعب العادية وكنت دايما بازور الأماكن الشعبية عشان بحب اشم ريحتك الجميلة فى دروبك وحواريكى .. كنت باحلم بفن مصرى يصل للعالمية و كنت بؤمن بأن للفن رسالة قائمة على الحرية والعدالة .. الحرية والعدالة اللى احنا اتحرمنا منها وصبحنا كل يوم نصحى فى ذل ومهانة .
عشان كدة يا حبيبتى قررت انى انزل يوم 25 يناير .. نزلت اطالب بالحرية والعدالة الاجتماعية رغم انى والحمد للة مستورة معايا ومش محتاج بس نزلت عشان اطالب بالكرامة للغنى والفقير للجعان والشبعان .. كان نفسى ولادى أدم و سلمى يعيشوا حياة كريمة ما يشفوش ذل ولا مهانة .. نزلت يا حبيبتى مع كل اللى بيحبوكى بجد .. نزلت رغم اللى كفرونى وحرموا نزولى .. نزلت اقول للظلم لا وللتوريث لا وللمهانة لا ... اتضربت يا مصر واتهنت واتبهدلت يوميها وقلت كلة فى حبك يهون وعشان عيونك قدام الجبروت مش حنتراجع ولا حانعود لحد ما ترجعلك حريتك وننتقم من كل اللى اغتصبوكى و انتهكوكى.
وقررت النزول يوم الجمعة 28 ... جمعة الغضب وكتبت على حسابى ع الفيس بوك يوم الخميس 27 "الأمن المركزي هراني ضرب بالشوم في منطقة الأسعاف ورغم دة هنزل بكرة ولو هم عاوزنها حرب احنا عاوزنها سلام بس انا بحاول استرد جزء كبير لكرامة مصر وشعبها ولحد دلوقت انا ماسك ومحافظ على الاسلوب اللائق في التعبير" دة كان اخر ستاتس كتبتة على حسابى ع الفيس بوك
يوم الجمعة صحيت من نومى بدرى وبدأت استعدت للنزول وحسيت ان النظام اتدق فى نعشة اول مسمار وان العملية بقت مجرد وقت .. اتوضيت وكلمت ابويا قعد يدعيلى وصوتة محشرج بالبكا .. واخر كلمة قالهالى ربنا ينصركم يا ابنى ويحفظ مصر و ما يصيبني فيك ابدا .. اخدت سلمى و أدم فى احضانى ووأنا نازل ندانى أدم اللى عندو 4 سنين وقاللى " بابا انا عايز اقول معاك الشعب يليد اسكات النزام '' بطريقتة بكل براءة.

نزلت بعد ما ودعت ولادى وودعت زوجتى وودعت ابويا .. صليت الجمعة ودعيت ... لقيت كل دعايا لمصر نسيت نفسى وولادى بكيت وانا بأقول يا رب انصر بلادى .. وصلت الميدان .. ميدان الحرية والكرامة .. ميدان الشهداء .. اول مرة احس ان الموت قريب منى وانا مش خايف منة .. المرة دى حسيت ان كلمة سلمية هى كلمة بتتقال من جانب واحد فقط هو الجانب الاعزل اللى من غير سلاح انما فعلا حسيت ان احنا الاقوى لان سلاحنا هو الايمان بأننا الاقوى والأحق اقوى من الخرطوش والغاز والرصاص الحى .. تأكدت وانا شايف الوحشية من الامن والنظام ان النظام فعلا سقط وان مبارك اظهر وجهه القذر الذى مكانة مزبلة التاريخ وان مصر تحررت من الظلمة بل فى هذة اللحظة ايقنت انهم كفرة قد يقتلون و يفعلون اى شئ فى سبيل الحفاظ على كيانهم وكراسيهم الزائلة.
رأيت امامى مستقبل جميل ينتظر أدم وسلمى .. رأيت زوجتى سعيدة تستقبلنى بالأحضان .. رأيت ابى دمعة تسقط من عينة وهو يقول ربنا ينصركوا يا أبنى ... رأيت أدم ابنى يقف بين اصحابة ويقول أنا أدم احمد بسيونى ... رأيت كل هذا على صورة دمى المنهمر على ارضك يا مصر .. لم اشعر بألم الرصاص الحى يخترق جسدى بل وجدت نفسى اسقط على ترابك لاراكى ترتفعين فى السماء وارى اولادى يرفرفون فى سماكى بأجنحة بيضاء وقبل ان اغمض عيني لقيت عربية الأمن بتدوس عليا بعجلها .... حاقولكم اية مهما حلفتلكم مش حتصدقونى واللة واللة واللة ما حسيت بأى الم كنت حاسس ان الملايكة شايلانى بين ايديها وانا سامع الناس حواليا بتصرخ وهما رايحين بيا مستشفى ام المصريين كان نفسى اقولهم سيبونى انا سعيد والملايكة شايلانى بس انا كنت سامعهم ومحدش سامعنى.

شفت سلمى بنتى اللى عندها سنة بتعيط لانها ما عدتش تفرح لما تلاقينى داخل البيت وأدم حزين لانى مش حاحكيلة الحدوتة اللى كنت باحكيهالة قبل ما ينام ومش حارسيملوا ميكى ماوس على دولابة زى ما وعدتة بس كنت متأكد انهم مش ممكن ينسوا انى ضحيت بحياتى علشان مصر وعلشان يعيشوا ايام اجمل واحلى .. وكان نفسى ان مصر كلها تفضل فاكرانى .. وان دمى ما يروحش هدر وأخد حقى انا واصحابى من اللى قتلونا وانى مابقاش مجرد صورة بهتانة متعلقة فى العربيات.
المهم يا حبيبتى فاتت سنة على موتى حسيت فيها بالسعادة والكرم والحب وسط الملايكة والحور وبرضة ما نستكيش كان نفسى اعرف اخبارك واية اللى حصل فى السنة دى لحد ما لقيت قدامى فى يوم مفاجأة جميلة .. ابويا .. ايوة ابويا قدامى وفى عينة نفس الدمعة وهوة بيحضننى .. سألتوا عن ولادى طمننى عليهم .. انما لما سألتوا عليكى لقيت لمحة حزن وما ردش عليا .. قولتلوا عملوا اية فى اللى قتلونى ... طب الثورة اخبارها اية نجحت واللا اية ... رد قاللى يابننى حاقولك اية الثورة .. اتباعت .. ولا اتركبت .. ولا اتسرقت .. اقولك تاجروا بدمائكم باسم الدين اللى كفروك لما نزلت .. اقولك كلة بقى همة الكراسى ونسيوا الشهدا والدم واهداف ثورتكم .. اقولك ان اللى قتللوك انت واصحابك عايشين عيشة الملوك ومفيش واحد دفع تمن الدم اللى ضيعوا .. اقولك ان كل يوم فية شهدا جداد وكلهم ما لهومش دية وكأن اللى موتهم ناس من عالم تانى .. اقولك ان اعراض الناس انتهكت على نفس الارض اللى دماكم سالت عليها و عجل العربيات دهسكم عليها و ومدعى الاسلام والثورة بيقاتلوا ع الحكم .. اقولك ان اللى قتلوكم وقاللو عليكم عملاء وخونة وكانوا عاويزين يوزعوا شربات وبونبونى على ارواحكم هما اللى عايزين ياخدوا الحكم ... حاقولك اية يابنى.

صدقينى يا حبيبتى كانت مفاجأة صعبة ليا بس بجد ما زعلتش من كلام ابويا لانى متأكد ان الدم اللى سال عشانك مش ممكن يروح هدر وان فية ناس كتير قوى قوى ممكن تضيع حياتها كلها علشان يوم واحد ممكن تعيشى فية بكرامة وعزة وان كلنا ممكن نموت انما انتى مش حتموتى ابدا .. مش ممكن تجار الدين حيخلوكى سلعة مقابل صفقاتهم للوصول للحكم .. مش ممكن المجلس العسكرى حيفضل يدوس عليكى علشان يحمى مبارك وعصابة الاوغاد اللى معاة طول ما ولادك موجودين ومكملين ثورتهم علشانك.
وفى نهاية رسالتى ليكى اوجة كلمة لكل ولادك الثوار
انا الشهيد أحمد بسيونى
فات على موتى كتير واللى قتلونى بيخرجوا براءة او قاعدين فى سجون مرفهة
حقى مارجعش , وابويا مات محروق على قتلى
حاسس ان دمى راح هدر بين برلمان طلع اخواتى بلطجية
وبين شعب ساكت مش بس ساكت على حقه
دا كمان ساكت على اللى قتلونىى
ياترى هتفضلوا ساكتين كدا كتير ؟
مش ناويين بقى تفوقوا وترجعولى حقى وحقكم قبلى ولا هتفضلوا نايمين ؟
انا الشهيد , اوعوا فى يوم تنسونى , اوعوا تنسوا دمى اللى راح عشانكم
وفى الختام حبيبتى دايما حتفضللى عايشة فى قلبى زى ما أنا دايما عايش فى وجدانك
ابنـــك الشهيد
أحمد بسيونى