الثلاثاء، 31 مايو 2011

فارس بنى خيبان


يحكى فى سالف العصر والأوان عن قوم كانوا يدعون بنى خيبان .. ولى عليهم ربهم حاكم بسيف القهر والطغيان وقطع رقاب كل من قال لا للسلطان .. رضى القوم بحياة يملؤها الذل والهوان حتى مر عليهم اعوام واعوام من المهان .. انحنت ظهورهم وقصرت رقابهم وابت ان تنطلق الى العنان .. جفت حناجرهم وانتفخت بطونهم من اكل الفول والباذنجان 

جاء يوم اراد الشعب ان يخلص من هذا الامتهان ويزيل عتمة عمت هذا الزمان .. ثار القوم وانتفضوا فى كل مكان يمتطون خيولهم ليكتشفوا انهم لازالوا فرسان .. ينفضون عن اجسادهم غبار الطغيان ليعلنوا انهم لن يكونوا بعد اليوم ابدا بنى خيبان .. جذوا بسيوفهم زمن القهر والعنفوان يرفضون الذل يوقظون ما بقى فيهم من انسان .. يرفعون هاماتهم شامخة تكاد تطال العنان يأبون ان يحنى رؤوسهم حاكم جبان .. التفوا حول بعضهم فقد وجدوا كيانهم وسط الميدان ثورة احيت قلوبهم وابادت زمن الاحزان 

وسط هذة الفرحة واستعادة القوم كبريائهم وعلو البنان صاروا فرحين بنصرهم واثبتوا انهم حقا فرسان .. ابى احد من يدعون انهم كانوا فرسان ان يخلص من حياة ملأها الذل والهوان .. رفض ان ينضم الى قومة فى الميدان واصر الا يخلع عن جسدة قميص بنى خيبان ..   امتنعت خيلة العربية الاصيلة ان يمتطيها فارس تخلى عن الشجعان ولفظتة حتى من فوق ظهورها الخرفان .. اصر ان يكون فارسا وذهب الى السوق ليشترى لعبة على شكل حصان يمتطيها لربما يلحق بزمن الفرسان .. اشترى لعبتة وظل يضغط على بطنها علة يسمع صهيلها فأبت حتى ان تقول ماء كالمعزان .. فكيف تصهل الخيل لمن يدعى انة فارس وقد ارتضى على نفسة الهوان .. وابى الا يكون فارسا الا لبنى خيبان فباللة عليكم عرفتم من هو فارس بنى خيبان يا .. اخوان

الثلاثاء، 10 مايو 2011

الى تانت رباب .. لقد هرمنا هرمنا من أجل هذة اللحظة التاريخية


لقد هرمنا هرمنا من اجل هذة اللحظة التاريخية .. العبارة دى يا تانت رباب لو كنتى بتتابعى قناة الجزيرة المحترمة قالها مواطن تونسى جميل بعد هروب بن على .. المواطن دة اسمة السيد أحمد الحسناوي الفرشيشي وعندة 46 سنة يعنى فى عز شبابة انما تشوفية يا تانت رباب تديلو 66 سنة فالراجل دة خير مثال على أن المعاناة تجعلنا نكبر ونشيخ قبل زماننا ويا ويلة يا سواد ليلة لو عاد بن على للحكم حيوري عم سيد اللى عمرة ما شافة

واللة يا تانت رباب ماخبيش عليكى وانتى عارفة معزتك عندى امبارح كان يوم كئيب وحزين بشكل لا تتخيلية لأنى حسيت ان الحلم
الجميل اللى كنا عايشينة حيطلع فشوش وان المؤامرة بدأت تتضح خيوطها وان ايادى خارجية هى اللى بتقود المؤامرة دى وطبعا معروف ان اللى بيقودها مين غير ماما امريكا وبابا صهيون وخصوصا ان بابا صهيون خد طاخ طيخ طوخ كدة كذا ضربة ورا بعض فى الايام القليلة اللى فاتت وهى بتتمثل فى ( فتح المعبر - اعادة النظر فى اتفاقية الغاز المشبوهة - الصلح التاريخى بين حماس وفتح ) يعنى على رأى فنانا الجميل المرحوم علاء ولى الدين كلة ضرب مفيش شتيمةوكل دة كان نتاج لثورة مصر المجيدة .. عشان كدة ماما امريكا بدأت تجند عملائها فى منطقة الخليج و الرئيس المخلوع حسنى مبارك اللى ممكن يتحالف مع الشيطان ابليس نفسة وسيدة لوحدة يا اونكل احمد فى سبيل مصالحة الشخصية .. وامبارح يا تانت رباب كان اول يوم يتغير فية شعار احنا اسفين يا ريس والمطالبة بعدم محاكمة سيادتة الى المطالبة بعودتة مرة اخرى للحكم عشان يرجع الامن والامان تخيلى يا تانت رباب حسيت ان كل شئ ضاع وان اللحظة التاريخية دى تبخرت وما اقدرش اوصفلك النار اللى كانت جوايا وحسيت ان هذا الخاين لو رجع مصر كلها حتبكى بدل الدموع دم 

وعايز اوضحلك حاجة مهمة قوى يا تانت رباب ان انا مقدرش اتهم اونكل احمد او اونكل رسمى بالخيانة زى ما قال اونكل محمد رسمى فهما الاتنين اكبر وانزة من ان يتهمهم احد بذلك وعلى رأى اونكل محمد مأمون حاشا وكلا ان حد حيزايد على حبهم لمصر بالعكس يجب ان نقدر ونحترم انهم بموجب انهم ينتميان الى الامن والقوات المسلحة و حسنى مبارك هو القائد الاعلى للجهازين يعنى بالبلدى كانوا بيشتغلوا تحت ايدة فيجب ان يكون هناك ولاء واحترام بحكم العمل الميرى وهذا شئ يقدر ويحترم  بالظبط زى لوحضرتك اتحول رئيس الجهاز بتاعك جودت العريان للمحاكمة اكيد حتبقى حاسة بالتعاطف معاة حتى لو كنتى متأكدة انة ابن ستين فى سبعين فدة شئ يدل على الاحترام والاخلاق 

وعندما نصحنى أونكل محمد رسمى ان اراجع تاريخ مصر ولا اخفى عليكى ولعى وعشقى للتاريخ قررت ان اراجع صفحات من تاريخ مصر وجدت الاتى وممكن اونكل احمد يراجنى لو فية اى حاجة غلط بصفتة موسوعة 
وجدت يا تانت رباب ان اليهود لعنة الله عليهم هم من زيفوا فى التاريخ ولأسف بعض العرب والمسلمين بيصدقو اليهود وبيعتبرو دة حاجة ضد مصر وتاريخها وهذا غلط لأن اليهود هم أكثر الناس كرة للفراعنة لأن التاريخ الفرعونى كشفهم وفضحهم ووحدانية اللة عند الفراعنة كشفت كذبتهم إلى بيتباهوا بها أنهم أول من وحد الله وهذا كذبة كبيرة ومخطط يهودي فهناك فرق بين فرعون وفرعون مصر كما جاء فى القرآن ففرعون  هم عامه الشعب من ابناء الحضاره الفرعونية 
حتى ان النبي ابراهيم عندما اتى لمصر درس الحضاره الفرعونيه وقرأ صحف النبي ادريس في مصر وهذا يدل على ايمانهم بما انزل على ادريس واحتفاظهم بصحفه ويثبت ان الانبياء هبطو على ارض مصر بعد ذلك للهكسوس الوثنيين فالفراعنه هم اول الموحدين في التاريخ
وهناك ادلة كثيرة لذلك من القران كما ورد فى كتاب "الفراعنة اول الموحدين" للدكتور نديم السيار 

فدة يا تانت رباب يؤكد ان الفراعنة لقب عظيم وليست سبة وهم ليسو عرب بل هم اصل الحضارة وان اوخذ عليهم تألية الحاكم وهو ما سيتم تأكيدة فى صفحات تالية من التاريخ

الصفحة التالية فى تاريخ مصر اللى انا قريتها هى صفحة مشرفة جدا فى التاريخ المصرى والاسلامى وان لم يحبها الكثيرين ومش عارف رأى اونكل احمد اية هى مرحلة المماليك .. وانا شخصيا اعتقد ان هؤلاء الملوك المماليك بغض النظر عن الفتن والمكائد التى حدثت بينهم فينطبق عليهم الاية الكريمة {مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلاً} فهؤلاء واخص منهم سيف الدين قطز والظاهر بيبرس جعلهم اللة سببا لانقاذ الدولة الاسلامية من الفناء ففى عين جالوت انتصر قطز على المغول انتصارا تاريخيا بعد ان قتلوا العباد، وخربوا البلاد فى الشام وقام هولاكو بقتل خليفة المؤمنين (مش فاكر اسمة بصراحةوهو لا يستحق التذكر) فقد مات تحت اقدام جنود هولاكو وجاء المدد من مصر علي يد قطز الذى اعطى هولاكو درسا لا ينساة واعاد العزة للاسلام 
كذلك بيبرس اللى طلع عين ام الصليبيين  لم يترك سنة في فترة ولايته دون أن يغزو الصليبيين ويحقق انتصارات عليهم واسترد كثيرًا من البلاد التي استولى عليها الصليبيون ووقف بيبرس للتتار وللصليبيين معًا بعد أن تحالفت قوى التتار والصليبيين ضد المسلمين  

المرحلة التالتة يا تانت رباب اللى عديت عليها وانا باقرأ تاريخ مصر كما اوصانى اونكل محمد رسمى هو النكسة والعياذ باللة وتنحى الرئيس الراحل جمال عبد الناصر بعد الهزيمة ولكن لم ينسى شعب مصر اصولة الفرعونية بتألية حكامهم فبعد الهزيمة بأربعة ايام  ظهر الزعيم العربي جمال عبد الناصر على التليفزيون فى 9 يونيو 1967 يعلن مسئوليته عما حدث وتنحيه عن الرئاسة ، إلا أن الجماهير المصرية والعربية خرجت في مظاهرات حاشدة في 10 يونيو تطالبه بالبقاء والاستعداد للحرب وتنشد:"من المحيط الهادر إلى الخليج الثائر لبيك عبد الناصر"لتتجلى صورة من صور التألية للحكام التى نعيشها الان يا تانت رباب مع الاختلاف الكامل بين عبد الناصر وحسنى مبارك 

بعد كدة كانت المرحلة الرابعة وفيها ظهر معدن الفراعنة الاصيل فى حرب اكتوبر الخالدة و الزعيم الخالد انور السادات الذى اعاد هيبة مصر وكانت هذة الحرب هى الانجاز الوحيد لمبارك وان لم يكن انجازة لانة كان انجاز السادات وكان هو اداة من ادوات هذا الانجاز وهى الضربة الجوية الاولى لان ببساطة كدة اى قائد تانى للقوات الجوية كان عمل اللى عملة مبارك انما اى زعيم غير السادات لم يكن ليحقق هذا الانجاز واعتقد ان اونكل محمد رسمى ممكن يصحح معلوماتى لو فيها غلط

بعد كدة نصل للمرحلة الخامسة من قراءتى لتاريخ مصر وهى ثورة 25 يناير التى تحقق فيها معجزة اخرى لتؤكد المعدن الاصيل للفراعنة والارادة التى حققت هذة اللحظة التاريخية التى هرمنا من اجل ان نراها وكانت بعيدة عن احلامنا لكنها تحققت وانتصرت ارادة الفراعنة  فى القضاء على الفساد والظلم والقهر وان خرج بعض عشق تألية الحكام بشعارات احنا اسفين يا ريس وانت ابونا و ترفض محاكمتة من هذا المنطلق رغم ان اللة سبحانة وتعالى امرنا بالقصاص والعدل  

بعد أن قرأت هذة الصفحات من التاريخ يا تانت رباب عادت لى الثقة وتأكدت ان فرعون الارادة والصمود لا يسقط ابدا وان فرعون مصر لا يمكن ان يعود ليحكم هذا الشعب فقد رحل مبارك ولن يعود ابدا حتى لو تحالف مع سيدة ابليس فلن تقوم لة قيامة اخرى ولن يعود ليقول لنا انا ربكم الاعظم فهذة الصفحات التى قرأتها من تاريخ مصر واشكر اونكل محمد على نصيحتة لى بقراءة هذا لتاريخ جعلتنى اليوم متفائلا بعد ان كنت بالامس متشائما وجعلتنى اليوم سعيدا بعد ان كنت بالامس مكتئبا فقد باع مبارك مصر كلها بأبخس الاموال حتى مياة النيل باعها ولكنة لم يبيع ابناء مصر الفراعنة التى افتخر ان اكون من ابنائها وبكل فخر اقول يا تانت رباب نعم انا فرعون

الاثنين، 9 مايو 2011

بين واقعية الأرنب وعاطفة الغزالة


يحكى عن غابة كان يحكمها ثعلب ماكر نجح بمكرة ودهائة فى السيطرة على كل اهل الغابة المسالمة والمهادنة بعد ان شعروا فى البداية انة سيكون ملكا عادلا ومحبا لاهل غابتة وخاصة ان حكمة جاء بتعزيز من الاسد الذى احبة كل اهل الغابة ووثقوا فية على مر عمرة المديد معهم حيث لم يخذلهم على مر تاريخة ووجودة معهم فى كل المواقف السابقة وكان بطلا فى عيونهم وأهلا للثقة والتقدير وعندما خرج الثعلب من عباءتة وثق فية الجميع خاصة عندما اعطاهم الامان بأنة يحبهم وربما كان صادقا او كان ماكرا ولكن وثق فية الجميع وأحبة الكثير .. وحقيقة لم يخذلهم الثعلب فى بداية حكمة للغابة وحاول ان يكسبهم من خلال وعودة بتحقيق احلامهم وحماية ابناءهم 

مع مرور السنوات وعدم وفاء الثعلب بأى من وعودة او تحقيقة لأحلام اهل الغابة بدأ اهل الغابة يشعرون بالضيق وبأن الثعلب استغل مكرة ودهاءة للسيطرة على عواطفهم وكسب محبتهم فى المقابل اصيب الثعلب بالقلق على حكمة وخوفة من ان يثور علية اهل الغابة وخاصة ان زوجتة بدأت تحذرة من خطورة ان يثور علية المحكومين فبدأ يخطط لان يكون حكمة ابديا وان يكون الحكم من بعدة لابنة وأقنعتة زوجتة وأولادة والمقربين منة من اهل الغابة مثل الذئب ووحيد القرن ان القوة والقمع هى السبيل الوحيد للحفاظ على حكمة خاصة بعد ان بدأ اهل الغابة من التذمر والهمهمة بشأن الاوضاع السيئة التى يعيشونها من جوع وفقر حيث اصيب الارنب بالضعف والنسناس ظهرت عظامة وبرزت من تحت جلدة من الجوع والوهن ولم تستطع الغزالة ان تدبر قوت ابنائها الاطفال حتى الزرافة الجميلة ممشوقة القوام التى كان كل اهل الغابة يتغنون بجمالها ودلالها انحنت رقبتها وفقدت حيويتها ونضارتها .. فى المقابل كان المقربين من الثعلب ينعمون فى الرفاهية كان الذئب يعيش فى بيتة الفاخر ووحيد القرن يعيش فى قصرة على البحر وكان الثعلب دائما ما يحاول ان يجذب الاسد الية وخاصة انة يعلم مدى حب الجميع لة فكان يغدق علية دائما بالاموال وان يقربة الية بالتفضيل والتمييز عن باقى اهل الغابة وكان دائما ما يحاول ان يذكرة انة خرج من عباءتة وانة اى الاسد هو مصدر حكمة وانة يدين بالفضل للاسد فى كلما وصل الية

ايضا بدأ المقربين من الثغلب فى اقناعة بأن يقرب الية الفيل نظرا لقوتة حيث يخاف منة كل اهل الغابة لضاخمتة المعهودة ولزلومتة التى يخافها الجميع من الكبير الى الصغير حيث ان ضربة من زلومتة قد تميت القوى قبل الضعيف كما انة يتسم بالغباء الشديد وعدم الادراك فهذا ما سيجعلة اداة يتحكم فيها الثعلب كيفما يشاء ويجندة لحمايتة من اى قلاقل او خروج على الأمن الدى هو امن الثعلب واولادة والمقربين لة وليس امن عامة اهل الغابة

بالفعل نجح الثعلب فى تجنيد الفيل لحفظ الامن بالغابة الذى كان لا يتوانى فى البطش بالضعفاء من أهل الغابة بالضرب والقتل وكان لا يهمة مريض او ضعيف بل كان كل همة ان ينال رضا الثعلب الذى اغدق علية بالأموال وان يشعرة انة سيد هذة الغابة وكل من فيها هم عبيد سيادتة وانة بزلومتة يستطيع ان يفعل بهم كل مايريد وان يسخرهم لخدمة الثعلب وحاشيتة
بالفعل بدأ الفيل ينشر سطوتة وعنفوانة على أهل الغابة المساكين وخاصة الارنب والنسناس حيث كان دائما ما يشعر انهم رغم ضالتهم وصغر حجمهم الا انهم هم الخطر الحقيقى على الثعلب وملكة اما الغزالة فكانت منكسرة ولا تحلم سوى بتوفير قوت ابنائها والزرافة ما يهمها فقط هو الحفاظ على جمالها .. اما الارنب فكان يحلم بالحرية والخلاص من الظلم والاستبداد

بعد مرور اعوام تناقلت الغابة بسعادة اخبار عن ان احدى الغابات المجاورة ثار اهلها على ملكهم الذى كان صديق الثعلب وكان يمارس نفس السياسات على اهل غابتة وبالفعل نجح اهلها البسطاء فى نزع الملك من هذا الملك الطاغية ونجحوا فى تحرير غابتهم من الظلم والطغيان مما اثار حفيظة الثعلب وقلقة مما دعاة الى استدعاء الفيل الذى طمأنة قائلا "يا سيادة الملك الامن عندنا غير اى غابة تانية دة كان امن خرع انما احنا مسيطرين تماما على الغابة وكل الحوش اللى فيها .. دة انا لو رفعت زلومتى بس كل البشر تروح بيوتها .. ما تقلقش يا مولانا "
بالفعل اطمأن الثعلب لكلام الفيل فى المقابل بدأ الارنب فى الشعور بالأمل فى الخلاص من الثعلب الدكتاتور واجتمع مع باقى اهل الغابة لبحث كيفية الثورة على الديكتاتور .. رحب النسناس بالفكرة وتحمس لها كثيرا كذلك الفأر الذى قال " يعنى ديتها اية الفيل حيموتنا .. ماهو كل يوم بيدوسلوا عشر فيران ومالهومش دية .. انا معاكو يا أرنب " فى المقابل تحفظت الغزالة واصابها الرعب مما قد يحدث وخرجت مهرولة من قبل ان يراها احد جنود الفيل ويتم القبض عليها

بدأ الارنب فى التخطيط للثورة وكان هدفها ان يضمن لهم الثعلب حياة كريمة وان يقيل الفيل من امن الغابة وان يساوى الثعلب بين عامة اهل الغابة وصفوة اهلها من المقربين من التعلب الحاكم ..وخرج الارنب مع العامة من اغلبية اهل الغابة فى المظاهرات للمطالبة بالمطالب الثلاثة التى تم تحديدها وعندما عرف الثعلب بذلك ارسل وامرة الفيل بالتعامل مع هؤلاء من مثيرى الفوضى .. وبالفعل تصدى الفيل بكل عنف للعامة من أهل الغابة واستهزأ الثعلب بطلباتهم مما دفع باقى اهل الغابة للاصرار على مساندة اصدقائهم خاصة بعد ان وصل الى مسامعهم ان اهلهم قد قتل منهم العشرات تحت اقدام الفيل وبزلومتة الغاشمة حتى الغزالة التى لم تشارك فكانت تشارك بقلبها ودعائها

ومع تزايد عنف الفيل بدأ اهل الغابة فى الارتفاع بمطالبهم لتصل الى عزل الثعلب من حكم الغابة وزاد عد المتظاهرين ضد الثعلب و ظلمة اضعاف واضعاف حتى ان الفيل بدأ فى فقدان السيطرة علهم رغم قتلة للمئات من اهل الغابة الثائرين وعندما شعر بفقدان السيطرة اصدر اوامرة لجنودة بالهروب ولاذ بالفرار قبل ان يفتك بة اهل الغابة
جن جنون الثعلب الذى استدعى الاسد فورا وقال لة "شفت يا أسد اللى عملة الرعاع فيا وفى الفيل دول ما عندهمش أصل نسيوا كل اللى انا عملتة عشانهم انزلهم وعلمهم الأدب "
سكت الاسد وهو يسمع اوامر الثعلب ثم نفذ اوامرة بالنزول الى اهل الغابة واثناء سيرة فى طريقة البيهم سمعهم وهم يهتفون يطالبون بحضورة اليهم والوقوف معهم وما ان رأوة حتى سيطرة عليهم الفرحة برؤيتة قفز النسناس على اكتافة وتعلق الفأر بذيلة ولعقتة القطة بكل حب بينما وقف الارنب مذهولا ومتشككا .. ماذا عساة الاسد ان يفعل هل سيخذلهم !!!!! ام سيقف معهم
انهمرت الدموع من اعين الاسد فلم يكن يتخيل ان يحبة العامة كل هذا الحب ليجد نفسة يحتضن الجميع قائلا "طول مانا معاكم محدش حيقدر يأذيكم حتى لو كان الثعلب نفسة "
فى هذة اللحظة فقط اطمئن الارنب وبكى فرحا وهو يقفز فوق ظهر الاسد ويغنى لعظمتة وولائة لشعبة وأهلة

اتجة الاسد عائدا الى الثعلب ليقول لة ان اهل الغابة لا يريدونة ملكا عليهم وانه اذا لم يستجيب لمطالبهم بترك الحكم فسيتركهم ليتأوا الية وربما قتلوة وانة لن يقف معة ضدهم .. حاول الثعلب ان يستعطف الاسد "انت نسيت يا أسد تاريخى معاك وازاى دافعنا عن الغابة دى ضد الأعداء " رد علية الاسد "انت اللى نسيت ضيعت دة كلة بالجرى ورا مصلحتك بالسرقة والقتل .. عمرك ما سمعت اهل الغابة عايزين اية ظلمتهم رغم ان الحاكم اولى صفاتة العدل وانت عمرك ما عدلت " قال لة الثعلب " خلاص يا أسد بس ادينى فرصة اخيرة وانا حاغير كل حاجة كل حاجة احلفلك بالايام العظيمة اللى عشناها مع بعض فاكر يا أسد .. فاكر مش كدة " وفجأة بدأ صوت اهل القرية يطالبون بالقبض على الثعلب ليصاب بحالة من الهلع والخوف عندما يسحبة الاسد الى خارج قصرة بينما يصرخ الثعلب " سيبونى انا ماعملتش حاجة ما كانش قصدى ..
الاسد وهو يسحبة " اسكت اهل الغابة هيا اللى حتقرر مصيرك
الارنب معنفا " انت اللى عملت كدة فينا وفى نفسك ذنبها اية الناس اللى انت قتلتها واللا علشان ارانب ونسانيس ما لهومش قيمة عندك
الثعلب صارخا "انا ما عملتش حاجة .. الفيل هوة اللى عمل كدة من دماغة انا طردتة ونزلت الاسد علشان يحميكوا منة .. انا عارف هوة بيحبكم قد اية
النسناس فى نبرة هادئة حزينة " والفلوس اللى انت سرقتها انت والذئب ووحيد القرن وسيبتنا احنا مش لاقيين غير الزبالة بتاعتكم ناكلها
الفأر منفعلا " وابنك اللى كنت عايز تركبة علينا علشان يخلص على اللى فاضل منا هو واصحابة
الارنب معنفا مرة اخرى " انت لازم تتحاكم انت وعصابتك على اللى عملتوة فينا واللى حيحكم بية القاضى لازم تنفذة
الثعلب باكيا " معقولة اهون عليكم بعد السن اللى انا وصلتلة دة وبعد عمرى اللى قضيتة وانا باحميكم وبادافع عنكم مفيش اى حد من غابة تانية كان يقدر يتعرض لكم ..30 سنة وانا باعانى من المرض وكل همى انى ادافع عنكم واحميكم
رد الارنب متعجبا "ما هو دة دورك امال انت ملك ازاى .. انت تحمينا وبعدنا تموتنا بزلومة فيلك وتسرق قوت يومنا
رد الثعلب مستعطفا "يعنى انا غلطت فى حاجة ما يشفعليش العشرة والايام اللى عشتها معاكم بحلوها ومرها .. كدة برضة دى اخرتها اتبهدل كدة واتحبس ويضيع تاريخى كدة برضة يا غابة للدرجة دى ماتت عواطفكم و بقيتوا قاسيين حرام عليكم انا بحب الغابة ومش حموت الا على ارضها
تدمع الزرافة بينما تبكى الغزالة وهى تصرخ " لا ما نقبلش بهدلتك يا ثعلب .. انت ملكنا انت ضيعت عمرك علينا وعمرنا ما حنغدر بيك انت رمز الغابة دى ومحدش يقدر يعملك حاجة وانت وسطينا
يتعجب الارنب من كلام الغزالة قائلا " معقولة اللى انتى بتقولية دة يا غزالة يعنى انتى فى الاول ما ترضيش تنزلى معانا وبعد ما مات منا اللى مات واتصاب منا اللى اتصاب واتبهدل مننا اللى اتبهدل وانتى كنتى قاعدة فى بيتك مستريحة جاية انتى دلوقتى عايزة تضيعى انتى كل الى احنا عملناة بأمارة اية " ويلتفت للأسد " دة يرضى ربنا يا أسد  أنا عايز أعرف حكمك اية!!!!!!1

--------------------------------------------------------------------------------------------
قال سيدنا عمر بن الخطاب رضي الله عنه
لو عثرت بغله بالعراق لسألنى الله تعالى عنها لما لم تمهد لها الطريق يا عمر 


وقال تعالى 
 ( وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ )