الأربعاء، 20 أبريل 2011

مقالة كتبتها يوم 14 ابريل 2008 عن اسراء عبد الفتاح

كانت طفلة جميلة شقية .. اول ما وعيت عالدنيا سمعت اغنية عفاف راضى الجميلة ..
مصر هى امى .. نيلها هو دمى
شمسها ف سمارى .. شكلها ف ملامحى
حتى لونى قمحى .. لون خيرك يا مصر
حبيت اسراء مصر منذ نعومة اظافرها .. حسيت بجمالها وسحرها .. امنت بكلام الخالد مصطفى كامل (لولم اكن مصريا لودت ان اكون مصريا ) رفضت كلام الخالد سعد زغلول (مفيش فايدة) لأ كانت متأكدة ان لازم يبقى فية فايدة طالما النفس داخل الرئة ..والدم بيسرى جوة العروق ويغذى القلوب
كبرت اسراء وبقت فى العشرينات اتفرجت على نشرات الاخبار على السى ان ان و الجزيرة والعربية والقنوات الجامدة دي .. ولقيت ان فى اوروبا والدول المتقدمة ..حتى الهنادوة ولا مؤخذاة عندهم حاجةغريبة شوية اسمها المظاهرات السلمية بعيد عنك ..انا عارف كلمة مظاهرة دى بتجيب للناس ارتيكاريا .. ما علينا فية حاجة تانية اسمها .. بعيد عنكم وعن السامعين ...اضراب سلمى ...ربنا يسترها الكلمة دى بتجيب اضراب على الأفى لحد ما يبانلاك صاحب ويعرف مكان سعادتك فين بالضبط فين دة لو كان واصل وعرف يبقى افى سيادتك لامؤخذة احمر من أفى القرد
المهم نرجع مرة تانية لموضوعنا اللة يسترها معاكم ومعانا ...شافت الانسة اسراء الكلام المحترم دة على القنوات المحترمة .. وكفانا اللة شر البيت بيتهم تامر وشرين(مع الاعتذار للفنانة الجميلة شيرين)
حاجة تانية مبهرة شافتها اسراء والمرة دى بقى شافتها عند تامر وشرين وكمان شوبير ... الريس قلع لامؤخذاة فى الكلمة البدلة ولبس قميص وبنطلون وقعد تحت الشجر يا وهيبة وعلى شط بحر الهوي ...قصدى على شط النهر الخالد (مع الاعتذار لكارم محمود ومحمد عبد الوهاب) ماحنا حنقضيها اعتذارات وقاعد يشرب الشاى مع الراجل البسيط عم مجاهد اللى بيحكى معاة عن مشاكلة والريس بيسمعة بكل حب
المهم اسراء لقيت ان رغم السعادة والخير اللى احنا عايشينة فية بعض الاشياء البسيطة الصغنتوتة اللى تستدعى اننا نعمل زى الدول المتقدمة و الهنادوة وغلطت اسراء وعملت تحريض (هما بيسموها كدة) على الاضراب والعياذ باللة .. اتاخديت وعندنا المسجون السياسى دة ازبل انواع المساجين يعنى لا يعامل معاملة تاجر المخدرات او الستات اللى مش كويسين بتوع هالة سرحان

نداء للأب السيد الرئيس محمد حسنى مبارك
=========================
اذا كنت لاتعاملنا معاملة الاب لأبنائة ..فعفوا لا يسعدنا ان نكون ابناءك

يا بلدنا يابلد هو من امتى الولد
بيخاف من امة لما فى الضلمة تضمة
صدقينى خفت منك .. خفت منك صدقينى
نفسى اقولك الف حاجة بس اة اة اة اة اة اة
اة لو تفهمينى

حمد للة ع السلامة بنتنا واختنا البطلة ..الطفلة سابقا ...اسراء عبد الفتاح

الثلاثاء، 19 أبريل 2011

احنا اسفين يا ريس


واللة انا مش عارف اية اللى حصللنا .. للدرجة دى وصل المصريين اللى معروف عنهم الطيبة والقلب الابيض وعدم نكران الجميل .. وصلوا للدرجة دى من الجحود والعصيان ونكران الجميل  .. لأة دة كتير قوى وعيب .. نسيتوا الضربة الجوية اللى قام بيها وانة كان صاحب الفضل فى انتصار تاريخى للعرب فى اكتوبر وان السادات اللة يرحمة اختارة تكريم لة وللقوات الجوية صاحبة الفضل فى الانتصار العظيم .
نسيتوا اللى اتعرض لة فى أديس ابابا وكان حيضيع حياتة فى سبيل حياة ابناء شعبة الفقير قبل الغنى والضعيف قبل القوى فعلا انا خجلان و مستحى من اللى بيحصل للراجل دة وهو عيان وعندة المرارة وفى السن دة بدل ما نكرمة ونشكرة على اللى عملة لمصر عايزين نحاكمة ونبهدلة ونبهدل عيالة .. نسينا انة ابونا فية حد يعمل كدة فى ابوة .. نسينا ان عمر سليمان والجيش كانوا بيتحايلوا علية عشان يبيدوا المتظاهرين ويدوسوهم بالدبابات وهوا أبى ورفض وقال الا ابنائى انا اتنحى ميت مرة من دة حكم ولا تسيل قطرة دم من صباع واحد من اولادى ابناء شعبى الاصيل المهاود .. هو دة اللى اتخانق مع حبيب العادلى وهزأة ومسح بكرامة اهلة الارض علشان سمح لنفسة يضرب ويموت المتظاهرين فى الشارع ونزل الجيش عشان يحمى ولادة 



حقيقى انا خجلان ومش عارف اقول اية خلاص دلوقتى لما اتمكنا افترينا كدة .. لما القوة بقيت لينا ننسى ان دة ابونا .. وبعدين بقى نبتدى نسمع الافترى ع الراجل والكلام اللى مش كويس اللى الناس تبتدى تقولة مش عارف كان بيجيلوا الكافيار والسيمون فيمية من باريس والناس مش لاقية تاكل والعيال الصغيرة بتدور فى صفايح الزبالة على لقمة تاكلها .. شوف الحقد ماهو رئيس مصر اكبر دولة فى العالم لو ما تغذاش كويس وحافظ على صحتة حيحكم ازاى البشر دى كلها .. ويقولوا المية كانت بتجيلوا من برة والناس بتشرب مية المجارى ولا مؤخذة البيبى بتاعة وبتاع عيالة .. شوفتوا حقد الناس دة ربنا خلق الناس درجات واحنا بنعترض على كلام ربنا .. احنا نسينا ان الراجل صاحب عيا وعندة المرارة عايزين يجيلوا فشل كلوى كمان .. لاحول ولا قوة الا باللة

وبعدين بقى المصيبة ان احنا كمان بنتدخل فى الاقدار يعنى الناس تموت فى العبارة يلزقوها فية طب ما هما اللى بيسترخصوا ما فية طيران وفية بواخر نضيفة اية اللى زنقهم ع العبارة المعفنة دى يعنى انا لقيت العبارة الامان فيها مش مظبوط اغيرها مفيش غيرها اقعد فى البلد ما البلد دى احسن من غيرها ما هو برضة افترى مننا اننا عايزين الريس يتمم على كل عبارة قبل ما تتطلع ناقص كمان يأمنلنا الميكروباص قبل ما نركبة 
الافكس من كدة كمان لما قطرين يطأشوا فى بعض والناس تموت الريس زنبوا اية ياجماعة حيقوم يشيل المححولجى ويقعد مكانة .. لأ الكلام دة مش مظبوط خالص وعيييب  هو الراجل ريس والا محولجى

الناس كمان بتحملة ان هو السبب فى الامراض اللى بتجيلهم هوة السبب فى السرطان والسبب فى الفشل الكلوى والسبب فى فيروس سى وكمان بى وامراض الصدر عشان الدخان والسحابة السودة اللى بقالها سنين 80 مليون مصرى بما فيهم الوزرا ورئيسهم مش عارفين لها سبب ولا علاج خلاص الريس هو اللى حيعرف سببها وعلاجها .. طب دة كلام يعنى مثلا انا راجل صدرى تعبان ولو فكرت كتير شوية با نهج دة بسبب الريس واللا التلوث واللا السحابة السودا ام بسبب اهمالى وانى قعدت انفخ فى سجاير تلوث صدرى وما بطلتهاش الا لما الدكتور قالى بالمفتشر كدة انى عندى قصور فى الرئة ولو ما حافظتش عيها حيجيلى فشل رئوى .. يبقى العيب فيا واللا فى الريس

يا جماعة لازم نكون صرحا مع نفسنا لان الافترى حرام وارحموا عزيز قوم زل ومننساش انة راجل صاحب  عيا برضة نيجى نتهمة اننا مش لاقيين ناكل طيب حيأكلنا منين يا جماعة ما احنا كتير برضة .. دة القطة بتاكل ولادها قوم هوة حيبقى مسئول يأكل 80 مليون واحد .. دة كلام يعقل برضة يا اصحاب الالباب

حقيقى انا نيابة عن كل مصرى باعتذر لهذا الرجل والرمز العظيم وباقوللة من قلب قلبى من جوة ..احنا اسفين يا ريس .. احنا اسفين على بهدلتك وبهدلة عيالك وانت فى السن دة ملعون ابو الشعب الجاحد اللى يعمل فى ابوة كدة وميرحمش سنة و مرضة و ضعفة



وبابعت رسالة للريس الجديد اللى جاى واقولة 

جوعنا ..اظلمنا .. تاجر باحلام ولادنا  .. غرقنا فى البحر لما يضيق رزقنا فى بلادنا .. دوس بجزمتك على بقنا عشان مانقولكش لأ .. اقتل ولادنا برصاصك .. شربنا مية المجارى .. اكلنا الزبالة وكل انت كافياراك .. سففنا التراب وخليك انت فى قصورك .. خلينا كورة يلعب بيها ولادك تقسيمة مع صحابهم .. ادبحنا وتاجر باشلاءنا .. بيعنا فى المزاد وهين كرامتنا .. اسرقنا .. انهبنا .. ادبحنا 
احنا قلبنا طيب حنحبك ونبكى عليك ونقولك


احنا اسفين يا ريس 

الأحد، 3 أبريل 2011

بين موقعتى الجمل والجلابية


ان ما حدث فى ستاد القاهرة بالأمس هو امتداد للحالة الامنيةالسلبية التى نعيشها من يوم الجمعة 28 يناير فى ظل حالة من التردى الامنى والثقة المفقودة بل والمعدومة بين المواطن ورجل الامن والتى فشلت كل المحاولات والشعارات للقضاء عليها بدون فائدة

ان ماحدث بالامس هوشئ طبيعى ان يحدث فى اى مكان فى العالم وفى اى ملعب تقام علية مباراة لكرة القدم فما بالك والمباراة يحضرها اكثر من 70 الف متفرج يملؤهم الحماس والشحن الذى ساهم فية الاخوين حسن سامحمها اللة علية بما يسمى التحريض العلنى للجمهور المصرى على نزول الملعب كما فعل الجمهور التونسى مع العلم ان ما حدث فى تونس لا يتعدى نزول فرد او اثنين فقط للملعب وتم التعامل معهما من الامن التونسى وهى حادثة طبيعية تحدث فى كل ملاعب العالم من خلال متابعتى للدورى الاسبانى والانجليزى والايطالى ان يدخل احد المشجعين الى الملعب حتى انة فى احد المباريات اقتحم احد المشجعين الملعب واتجة نحو النجم ميسى الى ان وصل الية والامن يطاردة بمنتهى القوة حتى وصل الى ميسى واشار الية اشارات خارجة قبل ان يلحقة الامن و ياخذ علقة محترمة ..طيب لو تخيلنا ان الامن كان سلبياولم يمنع هذا المشجع من تصرفة اية اللى كان ممكن يحصل .. بالتأكيد كان سيؤدى الى دخول جماهير اخرى الى ارض الملعب منهم اللمؤيد لهذا المشجع ومنهم المدافع عن نجمة ميسى وكان سيحدث مالا يحمد عقباة

اللى انا عايز اوصللة ان عدم جدية الامن فى التعامل مع الجماهير بداية من دخولها الى ارض الاستاد لمشاهدة المباراة ونهاية بالصورة التى انتهت اليها المباراة هى انعكاس لوضع متردى نحياة فى الايام السابقة يجسد حالة من الاحتقان والغليان بين رجل الامن والمواطن المصرى .. هذة الحالة من الغليان التى تراكمت على مدى اكثر من 20 سنة سببت للمواطن المصرى المقهور حالة من الغضب والتحفز تجاة رجل الامن تجلت ووضحت فى الانتقام من كل ما هو متعلق بالشرطة والامن من بعد 25 يناير

ان بعض المواطنين اعتقدوا ان نجاح ثورة 25 المجيدة كانت هزيمة وانكسار للامن وجهاز الشرطة فى مصر الذى كان اداة القمع والارهاب الذى يستخدمة النظام المنحل ضد المواطن المصرى المقهور .. هذا المواطن الذى اعتبر هذة الثورة هى القضاء على هذا القهر الذى كان يعيشة على يد النظام المنحل واداتة الرئيسية وهى .. جهاز الشرطة

ان هذا الاستاد كان يمثل قبل الثورة احد اهم مسارح القمع والاذلال للمواطن المصرى البسيط الذى ذهب ليشجع بلدة او نادية ..هذا المشجع الذى يطلق عية مشجع الدرجة الثالثة فى مباريات الكرة كان يتعرض للضرب والاهانة والاذلال بدون اى سبب واللة العظيم بدون اي سبب .. يعنى بالبلدى كدة كان عسكرى الامن المركزى يجرى وراك بالشومة بتاعتة عشان تدخل الاستاد ويجرى وراك بالشومة عشان يخللى الاستاد بسرعة وياويلك بقى لو كان جسمك تقيل شوية زى حالاتى حتتهبد واحدة ترقد فيها على ظهرك اسبوع

 فعلا المواطن المصرى كان عندة حالة من الارتيكاريا تجاة كل ما هو متعلق بالامن والشرطة حتى انة كان بيخاف يدخل القسم علشان يعمل بطاقة او يعمل محضر علشان كم الاستخفاف و المهانة اللى بيتعرض ليها داخل القسم .. هذا المواطن اللى اتعود يربط الحزام عشان ما يتاخدش مخالفة .. اتعود طالما العسكرى مش واخد بالة يسرقها عكسى بالمصطلح الدارج .. دى طبعا سببت مشكلة ان الناس علاقتها بالقانون هى الخوف من رجل الشرطة وليس احترام القانون ودى مشكلة زرعها فينا الانظمة اللى فاتت كلها الخووووووف من الشرطة هو اساس نجاح النظام الدكتاتورى 

واكاد ان اجزم (وقد اكون مخطئا) ان هذة المباراة لو اقيمت بعد ثورة 25 يناير وقبل ان تنزل الشرطة مرة اخرى الى الشارع المصرى وقت ان كان كل مواطن هو شرطى نفسة هو من يحمى بيتة واهلة بعد الانسحاب المخزى الذى حدث يوم 28 يناير ما كان سيحدث ما حدث .. ان الفوضى والانفلات الامنى حدث وتفشى بعد ان عادت الشرطة مرة اخرى فقبل نزول الشرطة ما كان لمواطن ان يخالف القانون وان فعل سيكون ملاما وسيشعر بالخزى لمجردان ترك سيارتة فى الممنوع او او سرقها عكسى وقال لة ولد ينظم المرور فى سن اولادة .. عيب على حضرتك .. ولكن بعد نزول الشرطة مرة اخرى اعتبر المواطن ان تسببة فى زيادة الانفلات الامنى هو ضربة اخرى للأمن و ما حدث بالامس هو استكمال لمسلسل التحدى بين المواطن المقهور ورجل الشرطة سبب هذة القهرة وتأكيد لانتصار الخامس والعشرون من يناير من وجهة نظر المواطن

ان مفهوم الثورة المضادة اللى كتر استخدامة عمال على بطال اصبح بايخ ومالوش طعم .. وبقى حجة لكل واحد (اصل دى ثورة مضادة) لأ اسمحولى انتم من تقودون هذة الثورة المضادة .. انتم من تثيرون الفوضى .. انتم من تقصرون نجاح الثورة على انها انتصار على جهاز شرطة فاسد استغلة نظام منحل لتحقيق اهدافة الدكتاتورية 

نعم انتم من تقودون هذة الثورة المضادة قد يكون هناك من يشعل هذا الفتيل ولكن انتم من تسكبون علية البنزين ليصبح نارا قد لا نتمكن من اطفائها و ستحرق كل مواطن فى هذا البلد .. ان فلول الحزب الوطنى تلفظ انفاسها الاخيرة ولا يساعد على بقائها حتى الان سوى نحن بالفوضى والانفلات الذى نصر علية .. اننا من يهدم ثورتنا وليس جمال مبارك او صفوت الشريف او الجيش بتواطؤة وولاءةلمبارك  .. ان الجيش عندما خير بين الشعب و النظام السابق قالها بوضوح .. الجيش اعلن مساندتة للشعب وثورتة.

ان الحفاظ على الثورة هو مسئولية كل مواطن مصرى .. كل ما يحدث الان هو رماد وبقايا لنظام فاسد وسيذوب فى الهواء ولن تبقى لة اية بقية حتى السلفيون الذين يسببون الرعب الان فى الشارع المصرى سيتلاشون من الصورة تدريجيا فهم كانوا دائما مرشدى أمن الدولة للاستدلال  على رجال الاخوان المسلمين .. فهم اول من حرم الخروج على الحاكم فى 25 يناير ولان هم الكارت الاخير لرجال النظام السابق لنشر الفوضى التى وعد بها حسنى مبارك فى حال تخلية عن الحكم .. ولكن الان اكتشفنا اننا من يسبب هذة الفوضى بعدم احترامنا للقانون واصرارنا على عدم اصلاح انفسنا حتى ينصلح حال بلدنا

ان الصورة الجميلة التى كانت عليها بلدنا فى قلب ميدان التحرير كانت منارة ونبراس ومصدر الهام للعالم كلة ..الثورة التى قال عنها الرئيس الأمريكي باراك أوباما : “يـجب أن نربي أبـناءنا ليصبحوا كشباب مصر” .. وقال عنها سيلفيو برلسكوني رئيس وزاراء إيطاليا: “لا جديد في مصر فقد صنع المصريون التاريخ كالعادة” .. وقال عنها ستولتنبرج رئيس وزراء النرويج : “اليوم كلنا مصريين” .. وقال عنها هاينز فيشر رئيس النمسا : “شعب مصر أعظم شعوب الأرض و يستحق جائزة نوبل للسلام” .. وقال عنها الكاتب البريطاني الشهير “روبرت فيسك” في مقال بعنوان “رحيل طاغية ونشوة شعب” لـ »الإندبندنت«: “هب المصريون ونفضوا عنهم خوفهم وطردوا الرجل الذي يحبه الغرب ويعتبره زعيما معتدلا.. نعم ليست شعوب أوروبا الشرقية وحدها القادرة علي مواجهة الوحشية وتحديها”


يا أيها المواطن المصرى الذى ابهر العالم بثورتة الملهمة انت وحدك من يستطيع الالتفاف على هذة الثورة العظيمة والحفاظ على مكتسباتها وعدم تعرضها للسرقة والفشل وتأكد انت وحدك من تسبب الفوضى والانفلات واذا كانت موقعة الجمل من خطط لها ونفذها يوم 2 فبراير بقايا وفلول الحزب الوطنى المنحل فان موقعة الجلابية ربما يكون قد اشعل فتيلها بقايا الحزب الوطنى (وان كنت لا أعتقد ذلك) ولكن من خطط لها ونفذها المواطن المصرى وكلاهما كان طعنة للثورة المصرية التى لم ولن تهتز سواء بجمل او بجلابية ولن يأتى اليوم الذى نقول فية .. ولا يوم من أيام مبارك بل اقول ان نسمة حرية نستنشقها الان افضل من كل الهواء الفاسد الذى دخل صدورنا طوال 30 سنة من العهد الفاشى 

الجمعة، 1 أبريل 2011

الليبرالية


اشتقت كلمة ليبرالية من ليبر وهي كلمة لاتينية تعني الحر .الليبرالية حاليا مذهب أو حركة وعي اجتماعي سياسي داخل المجتمع، تهدف لتحرير الانسان كفرد وكجماعة من القيود السلطوية الثلاثة (السياسية والاقتصادية والثقافية)، وقد تتحرك وفق أخلاق وقيم المجتمع الذي يتبناها تتكيف الليبرالية حسب ظروف كل مجتمع، وتختلف من مجتمع غربي متحرر إلى مجتمع شرقي محافظ.
-------------------------------------------------------------------------
الليبرالية أيضا مذهب سياسي واقتصادي معاً ففي السياسة تعني تلك الفلسفة التي تقوم على استقلال الفرد والتزام الحريات الشخصية وحماية الحريات السياسية والمدنية وتأييد النظم الديمقراطية البرلمانية والإصلاحات الاجتماعية.
-------------------------------------------------------------------------
المنطلق الرئيسى في الفلسفة الليبرالية هو أن الفرد هو الأساس، بصفته الكائن الملموس للإنسان، بعيداً عن التجريدات والتنظيرات، ومن هذا الفرد وحوله تدور فلسفة الحياة برمتها، وتنبع القيم التي تحدد الفكر والسلوك معاً. فالإنسان يخرج إلى هذه الحياة فرداً حراً له الحق في الحياة أولاً.ومن حق الحياة والحرية هذا تنبع بقية الحقوق المرتبطة: حق الاختيار، بمعنى حق الحياة كما يشاء الفرد، لا كما يُشاء له، وحق التعبير عن الذات بمختلف الوسائل، وحق البحث عن معنى الحياة وفق قناعاته لا وفق ما يُملى أو يُفرض عليه.
------------------------------------------------------------------------
بإيجاز العبارة، الليبرالية لا تعني أكثر من حق الفرد ـ الإنسان أن يحيا حراً كامل الاختيار في عالم الشهادة، أما عالم الغيب فأمره متروك في النهاية إلى عالِم الغيب والشهادة. الحرية والاختيار هما حجر الزاوية في الفلسفة الليبرالية، ولا نجد تناقضاً هنا بين مختلفي منظريها مهما اختلفت نتائجهم من بعد ذلك الحجر، سواء كنا نتحدث عن هوبز أو لوك أو بنثام أو غيرهم. هوبز كان سلطوي النزعة سياسياً، ولكن فلسفته الاجتماعية، بل حتى السلطوية السياسية التي كان يُنظر لها، كانت منطلقة من حق الحرية والاختيار الأولي. لوك كان ديموقراطي النزعة، ولكن ذلك أيضاً كان نابعاً من حق الحرية والاختيار الأولي. و بنثام كان نفعي النزعة، ولكن ذلك كان نابعاً أيضاً من قراءته لدوافع السلوك الإنساني (الفردي) الأولى، وكانت الحرية والاختيار هي النتيجة في النهاية.
-----------------------------------------------------------------------
وفي العلاقة بين الليبرالية والأخلاق، أو الليبرالية والدين، فإن الليبرالية لا تأبه لسلوك الفرد طالما أنه لم يخرج عن دائرته الخاصة من الحقوق والحريات، ولكنها صارمة خارج ذلك الإطار. أن تكون متفسخاً أخلاقياً، فهذا شأنك. ولكن، أن تؤذي بتفسخك الأخلاقي الآخرين، بأن تثمل وتقود السيارة، أو تعتدي على فتاة في الشارع مثلاً، فذاك لا يعود شأنك. وأن تكون متدينا أو ملحداً فهذا شأنك أيضا.
-----------------------------------------------------------------------
أما في الاقتصاد فتعني تلك النظرية التي تؤكد على الحرية الفردية الكاملة وتقوم على المنافسة الحرة واعتماد قاعدة الذهب في إصدار النقود..أهم شعار في الليبرالية هو: دعه يعمل دعه يمر . ويسمى الليبراليون بالحرييين فقد ارتبطت الليبرالية بالحرية الإقتصادية.
----------------------------------------------------------------------
الليبرالية عكس الراديكالية لا تعترف بمرجعية ليبرالية مقدسة؛ لأنها لو قدست أحد رموزها إلى درجة أن يتحدث بلسانها، أو قدست أحد كتبها إلى درجة أن تعتبره المعبر الوحيد أو الأساسي عنها، لم تصبح ليبرالية، ولأصبحت مذهبا من المذاهب المنغلقة على نفسها. مرجعية الليبرالية هي في هذا الفضاء الواسع من القيم التي تتمحور حول الإنسان، وحرية الإنسان، وكرامة الإنسان، وفردانية الإنسان. الليبرالية تتعدد بتعدد الليبراليين. وكل ليبرالي فهو مرجع ليبراليته. وتاريخ الليبرالية المشحون بالتجارب الليبرالية المتنوعة، والنتاج الثقافي المتمحور حول قيم الليبرالية، كلها مراجع ليبرالية. لكن أيا منها، ليس مرجعا ملزما، ومتى ألزم أو حاول الإلزام، سقط من سجل التراث الليبرالي.
---------------------------------------------------------------------
تقوم الليبرالية على الإيمان بالنزعة الفردية القائمة على حرية الفكر و التسامح و إحترام كرامة الإنسان و ضمان حقه بالحياة و إعتبار المساواة أساسا للتعاون و منطلقا لإحترام الأفراد وضمان حريتهم و لا يكون هناك أي دور للدولة في العلاقات الإجتماعية أو الأنشطة الإقتصادية إلا في حالة الإخلال بمصالح الفرد و المجتمع.
و تقوم الليبرالية أيضا على تكريس سيادة الشعب عن طريق الإقتراع العام و ذلك لتعبير عن إرادة الشعب و التخلص من الفساد في المجتمع و إحترام مبدأ الفصل بين السلطات التشريعية و القضائية و التنفيذية و أن تخضع هذه السلطات للتعديل من أجل ضمان الحريات الفردية و للحد من الإمتيازات الخاصة و رفض ممارسة السيادة خارج المؤسسات لكي تكون هذه المؤسسات معبرة عن إرادة الشعب.