الجمعة، 4 مايو 2012

الأربعاء، 2 مايو 2012

رسايل من الجنة (1)


حبيبتى مصر  



بعد الحب والتحية وحشتينى يا غالية وحشتنى شوارعك وحواريكى وحشتنى دروبك وحشنى فرحك فى عز عتمة لياليكى وحشنى الحزن والكرب اللى اترسم فى عيون اهاليكى وحشنى مية نيلك اللى متلوثة بغبرة بلانا بيها اللى سرقوكى ونهبوا كل خيرك وسابولنا فقرك وكربك وهمك وضلمة ليالكى.

حبيبتى مصر ... مش عارف انتى فاكرانى واللا ناسيانى ...فاكرة دمى اللى سال علشان يروى اراضيكى .. فاكرة اشلاء جسمى اللى ادهست تحت عجل الجبروت والطغيان اللى عشش حواليكى... خايف اكون اتنسيت وبقيت مجرد صورة بهتانة ليا انا واصحابى متعلقة فى مرايات العربيات والشمس كلتها وخلتها مجرد سراب .. خايف اكون مجرد دماء راحت هدر علشانك وعلشان ولادى ..ولادى أدم وسلمى اللى كنت باحلم انهم يشوفوا ايام اجمل من اللى شوفناها.. ويعيشوا احلام سالت دمانا عشان نحياها .

برضة حافكرك بيا رغم انى متأكد انك عمرك ما نسيتينى ولا حتنسينى .. أنا ابنك .. شارب من مية نيلك.. وشى متمرغ فى تراب اراضيكى .. دمى سال عشان دمك يجرى فى عروقك .. أنا يا مصر .. يا أمى شهيدك

أنا .... أحمد بسيونى



حبيبتى مصر انا رسام كان عندى 31 سنة حبيت بريشتى ارسم ليكى احلام جميلة ... والون اللى جاى من تاريخك بلون اخضر جميل يفتكرة ولادى ويعيش فى خيرة احفادى  ... خدت الماجستير من كلية التربية الفنية بجامعة حلوان واشتغلت مدرس مساعد فى  قسم الرسم والتصوير فى جامعة حلوان .. كان نفسى الفن يكون مفهوم وبسيط عند كل طبقات الشعب العادية وكنت دايما بازور الأماكن الشعبية عشان بحب اشم ريحتك الجميلة فى دروبك وحواريكى .. كنت باحلم بفن مصرى يصل للعالمية و كنت بؤمن بأن للفن رسالة قائمة على الحرية والعدالة .. الحرية والعدالة اللى احنا اتحرمنا منها وصبحنا كل يوم نصحى فى  ذل ومهانة .



عشان كدة يا حبيبتى قررت انى انزل يوم 25 يناير .. نزلت اطالب بالحرية والعدالة الاجتماعية رغم انى والحمد للة مستورة معايا ومش محتاج بس نزلت عشان اطالب بالكرامة للغنى والفقير للجعان والشبعان .. كان نفسى ولادى أدم و سلمى يعيشوا حياة كريمة ما يشفوش ذل ولا مهانة .. نزلت يا حبيبتى مع كل اللى بيحبوكى بجد .. نزلت رغم اللى كفرونى وحرموا نزولى .. نزلت اقول للظلم لا وللتوريث لا وللمهانة لا ... اتضربت يا مصر واتهنت واتبهدلت يوميها وقلت كلة فى حبك يهون وعشان عيونك قدام الجبروت مش حنتراجع ولا حانعود لحد ما ترجعلك حريتك وننتقم من كل اللى اغتصبوكى و انتهكوكى.


وقررت النزول يوم الجمعة 28 ... جمعة الغضب وكتبت على حسابى ع الفيس بوك يوم الخميس 27 "الأمن المركزي هراني ضرب بالشوم في منطقة الأسعاف ورغم دة هنزل بكرة ولو هم عاوزنها حرب احنا عاوزنها سلام بس انا بحاول استرد جزء كبير لكرامة مصر وشعبها ولحد دلوقت انا ماسك ومحافظ على الاسلوب اللائق في التعبير"  دة كان اخر ستاتس كتبتة على حسابى ع الفيس بوك




يوم الجمعة صحيت من نومى بدرى وبدأت استعدت للنزول وحسيت ان النظام اتدق فى نعشة اول مسمار وان العملية بقت مجرد وقت .. اتوضيت وكلمت ابويا قعد يدعيلى وصوتة محشرج بالبكا .. واخر كلمة قالهالى ربنا ينصركم يا ابنى ويحفظ مصر و ما يصيبني فيك ابدا .. اخدت سلمى و أدم فى احضانى ووأنا نازل ندانى أدم اللى عندو 4 سنين وقاللى " بابا انا عايز اقول معاك الشعب يليد اسكات النزام '' بطريقتة بكل براءة.


نزلت بعد ما ودعت ولادى وودعت زوجتى وودعت ابويا .. صليت الجمعة ودعيت ... لقيت كل دعايا لمصر نسيت نفسى وولادى بكيت وانا بأقول يا رب انصر بلادى .. وصلت الميدان .. ميدان الحرية والكرامة .. ميدان الشهداء .. اول مرة احس ان الموت قريب منى وانا مش خايف منة .. المرة دى حسيت ان كلمة سلمية هى كلمة بتتقال من جانب واحد فقط هو الجانب الاعزل اللى من غير سلاح انما فعلا حسيت ان احنا الاقوى لان سلاحنا هو الايمان بأننا الاقوى والأحق اقوى من الخرطوش والغاز والرصاص الحى .. تأكدت وانا شايف الوحشية من الامن والنظام ان النظام فعلا سقط وان مبارك اظهر وجهه القذر الذى مكانة مزبلة التاريخ وان مصر تحررت من الظلمة بل فى هذة اللحظة ايقنت انهم كفرة قد يقتلون و يفعلون اى شئ فى سبيل الحفاظ على كيانهم وكراسيهم الزائلة.


رأيت امامى مستقبل جميل ينتظر أدم وسلمى .. رأيت زوجتى سعيدة تستقبلنى بالأحضان .. رأيت ابى دمعة تسقط من عينة وهو يقول ربنا ينصركوا يا أبنى ... رأيت أدم ابنى يقف بين اصحابة ويقول أنا أدم احمد بسيونى ... رأيت كل هذا على صورة دمى المنهمر على ارضك يا مصر .. لم اشعر بألم الرصاص الحى يخترق جسدى بل وجدت نفسى اسقط على ترابك لاراكى ترتفعين فى السماء وارى اولادى يرفرفون فى سماكى بأجنحة بيضاء وقبل ان اغمض عيني لقيت عربية الأمن بتدوس عليا بعجلها .... حاقولكم اية مهما حلفتلكم مش حتصدقونى واللة واللة واللة ما حسيت بأى الم كنت حاسس ان الملايكة شايلانى بين ايديها وانا سامع الناس حواليا بتصرخ وهما رايحين بيا مستشفى ام المصريين كان نفسى اقولهم سيبونى انا سعيد والملايكة شايلانى بس انا كنت سامعهم ومحدش سامعنى.



شفت سلمى بنتى اللى عندها سنة بتعيط لانها ما عدتش تفرح لما تلاقينى داخل البيت وأدم حزين لانى مش حاحكيلة الحدوتة اللى كنت باحكيهالة قبل ما ينام ومش حارسيملوا ميكى ماوس على دولابة زى ما وعدتة بس كنت متأكد انهم مش ممكن ينسوا انى ضحيت بحياتى علشان مصر وعلشان يعيشوا ايام اجمل واحلى .. وكان نفسى ان مصر كلها تفضل فاكرانى .. وان دمى ما يروحش هدر وأخد حقى انا واصحابى من اللى قتلونا وانى مابقاش مجرد صورة بهتانة متعلقة فى العربيات.



المهم يا حبيبتى فاتت سنة على موتى حسيت فيها بالسعادة والكرم والحب وسط الملايكة والحور وبرضة ما نستكيش كان نفسى اعرف اخبارك واية اللى حصل فى السنة دى لحد ما لقيت قدامى فى يوم مفاجأة جميلة .. ابويا .. ايوة ابويا قدامى وفى عينة نفس الدمعة وهوة بيحضننى .. سألتوا عن ولادى طمننى عليهم .. انما لما سألتوا عليكى لقيت لمحة حزن وما ردش عليا .. قولتلوا عملوا اية فى اللى قتلونى ... طب الثورة اخبارها اية نجحت واللا اية ... رد قاللى يابننى حاقولك اية الثورة .. اتباعت .. ولا اتركبت .. ولا اتسرقت .. اقولك تاجروا بدمائكم باسم الدين اللى كفروك لما نزلت .. اقولك كلة بقى همة الكراسى ونسيوا الشهدا والدم واهداف ثورتكم .. اقولك ان اللى قتللوك انت واصحابك عايشين عيشة الملوك ومفيش واحد دفع تمن الدم اللى ضيعوا .. اقولك ان كل يوم فية شهدا جداد وكلهم ما لهومش دية وكأن اللى موتهم ناس من عالم تانى .. اقولك ان اعراض الناس انتهكت على نفس الارض اللى دماكم سالت عليها و عجل العربيات دهسكم عليها و ومدعى الاسلام والثورة بيقاتلوا ع الحكم .. اقولك ان اللى قتلوكم وقاللو عليكم عملاء وخونة وكانوا عاويزين يوزعوا شربات وبونبونى على ارواحكم هما اللى عايزين ياخدوا الحكم ... حاقولك اية يابنى.



صدقينى يا حبيبتى كانت مفاجأة صعبة ليا بس بجد ما زعلتش من كلام ابويا لانى متأكد ان الدم اللى سال عشانك مش ممكن يروح هدر وان فية ناس كتير قوى قوى ممكن تضيع حياتها كلها علشان يوم واحد ممكن تعيشى فية بكرامة وعزة وان كلنا ممكن نموت انما انتى مش حتموتى ابدا .. مش ممكن تجار الدين حيخلوكى سلعة مقابل صفقاتهم للوصول للحكم .. مش ممكن المجلس العسكرى حيفضل يدوس عليكى علشان يحمى مبارك وعصابة الاوغاد اللى معاة طول ما ولادك موجودين ومكملين ثورتهم علشانك.

وفى نهاية رسالتى ليكى اوجة كلمة لكل ولادك الثوار



انا الشهيد أحمد بسيونى
فات على موتى كتير واللى قتلونى بيخرجوا براءة او قاعدين فى سجون مرفهة
حقى مارجعش , وابويا مات محروق على قتلى
حاسس ان دمى راح هدر بين برلمان طلع اخواتى بلطجية
وبين شعب ساكت مش بس ساكت على حقه
دا كمان ساكت على اللى قتلونىى
ياترى هتفضلوا ساكتين كدا كتير ؟
مش ناويين بقى تفوقوا وترجعولى حقى وحقكم قبلى ولا هتفضلوا نايمين ؟
انا الشهيد , اوعوا فى يوم تنسونى , اوعوا تنسوا دمى اللى راح عشانكم

وفى الختام حبيبتى دايما حتفضللى عايشة فى قلبى زى ما أنا دايما عايش فى وجدانك

ابنـــك الشهيد

أحمد بسيونى







الأحد، 22 يناير 2012

من محمد نجيب الى الاخوان .. العسكر بين الصفقة والصفعة


فى 23 يوليو عام 1952 عندما قام الضباط الاحرار بالانقلاب العسكرى على الملك فاروق تحول هذا الانقلاب الى تأييد شعبى من الشعب المصرى بكافة انتماءاتة وتوافقة ليقف خلف الجيش ويحول انقلابة العسكرى الى ثورة شعبية باركها الشعب المصرى فرحا بجيشة وجنودة البواسل الذين قاموا بهذة الثورة التى بعد نجاحها اراد زعيمها الراحل محمد نجيب ان يسلم السلطة لحكومة مدنية منتخبة وكان بذلك سيختصر سنوات من الحكم العسكرى المستبد الذى اغرقنا فى بحورة العميقة لستة عقود من اللا ديموقراطية فما كان الا ان انقلبت الثورة على قائدها محمد نجيب الذى كان واجهة للانقلاب فان فشل كان هو كبش الفداء وان نجح وقد حدث ذلك بالفعل فسيكون من السهل الاطاحة بة للاستيلاء العسكرى على حكم البلاد مستغلين بذلك حب الشعب المصرى لجيشة الباسل الذى تحول الى ملحمة عشق وتألية لجمال عبد الناصر جعلت الناس ترى انجازاتة وكأنها انجازات الهية ولا يرى اخطاءة المهلكة للامة وكأنة معصوما من الخطأ.

وهكذا تحول محمد نجيب من قائد للثورة الى كبش فداء لطمع العسكر فى حكم مصر بعد ان كان يريد ان يسلم الحكم والبلاد لحكومة مدنية وهو ما يتعارض مع طموح عبد الناصر واعوانة.
مرت الاعوام وتتابعت العقود على مصر المحروسة وانظمتها الحاكمة العسكرية تزداد استبدادا يوما بعد يوم وعاما بعد عام حتى وصلت الى اقسى درجات الظلم والاستبداد فى عهد الرئيس المخلوع الغير مأسوف علية حسنى مبارك الذى استمر فى الحكم الديكتاتورى لدة 30 عام باع خلالها ضميرة وتحالف مع الشيطان ضد مصلحة شعبة .. اهدر كرامة وطنة فى اعماق البحور على متن عبارة اغرقها زبانية فسادة .. باع الغاز الى عدوة بأبخس الاسعار بينما شعبة يقاتل من اجل ان ينال حظة فى الحصول على انبوبة بوتجاز يقضى بها احتياجاتة .. حرق ابناءة فى قطار و مثقفية فى مسرح دون ان يحاسب مسئول او تتحرك لة شعرة كان يشاهد مع زوجتة وابناؤة مباراة لكرة القدم ويحتفل بفوز المنتخب بينما يعلوا صراخ وعويل امهات الشهداء وهم يتعرفون على جثث ابنائهم الغارقة فى بحور الحلم بالبحث عن فرصة حياة افضل فشل فى توفيرها لهم وقتلهم حينما تركوا بلادهم للبحث عنها خارج اوطانهم.

هنا قام الشعب بثورتة بعد ان فاض من الكيل ما فاض واصبحت البلاد على حافة الهاوية صرخ الشعب فى وجة من اغتصب حقوقة وداس على كرامتة لسنوات طويلة حطم قيود يأسة واغلالة وازال الكمامة من فوق فمة وحرر لسانة من قيودة ليهتف فى وجة من ظلموة هتافة الخالد (الشعب يريداسقاط النظام) ونجح الشعب فى ثورتة الخالدة ولم يجد امامة سوى الجيش ليبارك هذة الثورة كما بارك الشعب ثورة الجيش من 60 عاما وحولها من انقلاب عسكرى الى ثورة شعبية اراد الشعب من الجيش ان يرد لة الجميل وان يحتضن ثورتة ويكسبها الشرعية ليعلوا هتاف (الجيش والشعب ايد واحدة) ويجد الشعب الثائر الجيش وحدة أمامة يمد لة يدة ويعطية الأمان ليستلم ثورتة الشعبية وبكل حسن نية يسلمها الى المجلس العسكرى ونسى الجميع تلميحات بل قل تصريحات رجل المستحيل عمر سليمان عندما قال اما قبول مبارك باصلاحاتة الوهمية او القبول بالانقلاب العسكرى هذا ما أعلنة رجل المستحيل صراحة ولم يفطن احد من الثوار او حتى النخبة الى هذا التلميح من نائب الرئيس فى ذلك الوقت ان الانقلاب العسكرى هو الحل البديل الذى ستلجأ لة السلطة حال فشلها فى السيطرة على الثورة ثم كان وكما يقولون بالبلدى الانقح من ذلك ان الجميع نسى أو لم يدرك لعدم خبرتة بالدهاء السياسى ما جاء فى خطاب التنحى لمبارك وعلى لسان رجل المستحيل ايضا بأن مبارك قرر تخلية عن حكم البلاد ويعهد للمجلس العسكرى بتولى ادارة شئون البلاد هنا انتلقت الافراح وتبادل الجميع التهانى ولم يفطن او يحلل احد الالفاظ الموجودة فى الخطاب القصير واهمها التخلى وليس التنحى وانة يعهد الى المجلس الأعلى بادارة شئون البلاد ولم يتساءل احد عن صلاحيتة فى التخلى عن السلطة للمجلس العسكرى وعلاقة ذلك بالانقلاب العسكرى السابق التلميح الية من رجل المستحيل.

ما علينا شربنا المقلب وفرحنا وسلمنا الثورة على طبق من ذهب للمشير ورجال المجلس العسكرى وفى البداية كانت الصفقة بين مبارك والمجلس العسكرى بأن يستلم المجلس الحكم لحماية مبارك ورجالة وثرواتة المنهوبة من البلاد ومفيش مانع لو الامور استقرت وعادت لطبيعتها ان يعود مبارك لمكانة ويستلم الامانة مرة اخرى من رجالة رجال المجلس العسكرى ولكن مع الضغوط الشعبية المطالبة بمحاكمة مبارك ورجالة بدأ النائب العام فى استدعاء مبارك ورجالة وبدأت المحاكمات الهزلية التى اشبة بالكوميديا السوداء التى لازلنا نعيش فصولها المسرحية حتى الان والتى ستنتهى بالبراءة الحتمية لمبارك وابنائة
من ناحية اخرى لاح فى الافق الطموح السياسى لجماعة الاخوان المسلمين بعد سنوات من الكبت السياسى والاضطهاد والظلم على مر العصور السابقة والتى وصلت لذروتها فى عهد المخلوع حيث كانت فيما سبق تسمى بالجماعة المحظورة لتصبح بعد الثورة هى الجماعة المحظوظة التى حصدت اكثر من 45% من مقاعد البرلمان وتقبلنا ذلك طالما هى رغبة شعبية وتحقيقا للديموقراطية التى قامت الثورة من أجلها وعلى التوازى كان المجلس العسكرى قد بدأ ينتهج منهجا جديدا فى التعامل مع شباب الثورة والحركات التى كانت الجمرة التى اشعلت الثورة مثل حركة كفاية وحركة 6 ابريل من توجية الاتهامات بالعمالة والتخوين ومرورا باحداث العنف المفرط فى احداث ماسبيرو ومحمد محمود ونهاية بالأحداث والانتهاكات المؤسفة فى احداث مجلس الوزراء حتى أن الجماعة المحظورة الان والتى كانت سابقا هى جماعة الاخوان المسلمون أصبحت حركة 6 ابريل
المهم بدأ يظهر فى الصورة ملامح الرغبة من المجلس العسكرى فى استقطاب الرغبة الشعبية لبقائة فى الحكم عن طريق ضرب رموز الثورة واتهامهم بالعمالة والتحريض فى الوقت الذى خلع فية المشير بدلتة العسكرية ونزل للتجول فى شوارع وسط البلد فيما يشبة الدعاية الانتخابية وسط شحن اعلامى غير عادى من الاعلام الحكومى المرئى والمسموع فيما ذكرنا بالحملة الرئاسية للمخلوع فى 2005 .

هنا بدأت ملامح الصفقة بين المجلس العسكرى والاخوان تلوح فى الأفق حيث تتمثل هذة الصفقة فى تأمين الخروج من السلطة للمجلس العسكرى ورجالة والعفو عن مبارك وابنائة مع عدم الاقتراب من ثروات المشير او افراد المجلس العسكرى فى مقابل تدعيم المجلس سيطرة الاخوان لمقاليد الحياة السياسية الكاملة فى مصر وهو الحلم الذى ظل يراود الاخوان لسنوات وسنوات فبدأ التخطيط لاختيار رئيس يتوافق علية الاخوان والمجلس العسكرى ليدعمة الاخوان فى الانتخابات الرئاسية فظهر فى الافق الدكتور احمد زويل الذى يمنعة الدستور من الترشح للرئاسة على ان يتم عمل بعض التعديلات الدستورية التى تناسب ترشح الدكتور زويل مع وجود ترزى الدساتير الجديد ممدوح شاهين ولكن كان الاعتذار المهذب من الدكتور زويل عن الاشتراك فى هذة اللعبة التى كانت سببا فى اعتذار الدكتور البرادعى عن الترشح لانتخابات الرئاسة واشتراكة فى تمثيلية هزلية يشارك فيها المجلس والاخوان لاختيار رئيس تفصيل فبدأ الاخوان بعد مليونية الجمعة 18 نوفمبر وتحديدا منذ احداث محمد محمود فى الابتعاد عن الساحة الثورية والتركيز فى الحياة السياسية والحفاظ على الغنائم المكتسبة من الانتخابات البرلمانية فكان شجب قيادات الاخوان لمتضاهرى ومعتصمى محمد محمود ومجلس الوزراء وتأكيد وصفهم المزعوم من المجلس بالبلطجية ومساندتهم للمجلس فى الانتهاكات الصارخة فى التعامل مع الثوار وبصفة خاصة من الفتيات المحجبات والمنقبات والتى كانت خط احمر عند الاخوان والسلفيين فكان سكوتهم المريب تجاة تلك الانتهاكات بل وجدنا القاء اللوم على الضحية مثل عبارات قيلت (وهىة اية اللى نزلها) او انها (لابسة العباية على اللحم لية) وغيرة من التبريرات الغير معتادة من الاخوان فى مثل هذة الانتهاكات التى ثار لها حتى رجال الازهر من الشرفاء.

كما رفض الاخوان النزول فى الخامس والعشرون لاستكمال والتأكيد على مطالب الثورة ورفض اى  محاولة للخروج على الحاكم كما كان رفضهم السابق الخروج على المخلوع فى بداية الثورة
هكذا تأكد تواطؤ الاخوان للحفاظ على الهدف الذى تم تسجيلة بالطرق المشروعة والغير مشروعة حتى لو كان على حساب الثورة واهدافها وتجلى للجميع الصفقة المعقودة بين المجلس العسكرى والاخوان ولكن هل سيحافظ المجلس العسكرى على هذة الصفقة ام ستتحول الى صفعة يتلقاها الاخوان كالصفعة التى تلقاها من قبل اللواء محمد نجيب اعتقد وقد اكون مصيبا وقد اكون مخطئا ان المجلس العسكرى ليس فى نيتة تسليم السلطة للمدنيين وانة ينوى الاستمرار فى الحكم والانقلاب على السلطة سواء فى شخص المشير او غيرة من اعضاء المجلس العسكرى وهنا ستكون الصفعة التى يتلقاها الاخوان من المجلس ولكن لن تتلقاها الثورة التى لن تنهزم فثورات الشعوب لا تنهزم وارادة الشعوب لا تقهر سواء فى مصر او سوريا او اليمن ستنتصر مهما كانت التضحيات والخسائر ولكن امام انتصارها سيتعرى الجميع من تأمر عليها ومن اراد وأدها وهى فى مهدها اننا نرفض الاحتفال بثورة لم تكتمل وحلم لم يتحقق فلتكتمل الثورة ولتنتصر على اعدائها وكل ما تبقى من نظام مبارك ولتسقط المحاكمات المدنية التى تتنافى مع روح الثورات ولتكن عدالة الثورة هى الحاكمة والأمرة .