واللة انا مش عارف اية اللى حصللنا .. للدرجة دى وصل المصريين اللى معروف عنهم الطيبة والقلب الابيض وعدم نكران الجميل .. وصلوا للدرجة دى من الجحود والعصيان ونكران الجميل .. لأة دة كتير قوى وعيب .. نسيتوا الضربة الجوية اللى قام بيها وانة كان صاحب الفضل فى انتصار تاريخى للعرب فى اكتوبر وان السادات اللة يرحمة اختارة تكريم لة وللقوات الجوية صاحبة الفضل فى الانتصار العظيم .
نسيتوا اللى اتعرض لة فى أديس ابابا وكان حيضيع حياتة فى سبيل حياة ابناء شعبة الفقير قبل الغنى والضعيف قبل القوى فعلا انا خجلان و مستحى من اللى بيحصل للراجل دة وهو عيان وعندة المرارة وفى السن دة بدل ما نكرمة ونشكرة على اللى عملة لمصر عايزين نحاكمة ونبهدلة ونبهدل عيالة .. نسينا انة ابونا فية حد يعمل كدة فى ابوة .. نسينا ان عمر سليمان والجيش كانوا بيتحايلوا علية عشان يبيدوا المتظاهرين ويدوسوهم بالدبابات وهوا أبى ورفض وقال الا ابنائى انا اتنحى ميت مرة من دة حكم ولا تسيل قطرة دم من صباع واحد من اولادى ابناء شعبى الاصيل المهاود .. هو دة اللى اتخانق مع حبيب العادلى وهزأة ومسح بكرامة اهلة الارض علشان سمح لنفسة يضرب ويموت المتظاهرين فى الشارع ونزل الجيش عشان يحمى ولادة
حقيقى انا خجلان ومش عارف اقول اية خلاص دلوقتى لما اتمكنا افترينا كدة .. لما القوة بقيت لينا ننسى ان دة ابونا .. وبعدين بقى نبتدى نسمع الافترى ع الراجل والكلام اللى مش كويس اللى الناس تبتدى تقولة مش عارف كان بيجيلوا الكافيار والسيمون فيمية من باريس والناس مش لاقية تاكل والعيال الصغيرة بتدور فى صفايح الزبالة على لقمة تاكلها .. شوف الحقد ماهو رئيس مصر اكبر دولة فى العالم لو ما تغذاش كويس وحافظ على صحتة حيحكم ازاى البشر دى كلها .. ويقولوا المية كانت بتجيلوا من برة والناس بتشرب مية المجارى ولا مؤخذة البيبى بتاعة وبتاع عيالة .. شوفتوا حقد الناس دة ربنا خلق الناس درجات واحنا بنعترض على كلام ربنا .. احنا نسينا ان الراجل صاحب عيا وعندة المرارة عايزين يجيلوا فشل كلوى كمان .. لاحول ولا قوة الا باللة
وبعدين بقى المصيبة ان احنا كمان بنتدخل فى الاقدار يعنى الناس تموت فى العبارة يلزقوها فية طب ما هما اللى بيسترخصوا ما فية طيران وفية بواخر نضيفة اية اللى زنقهم ع العبارة المعفنة دى يعنى انا لقيت العبارة الامان فيها مش مظبوط اغيرها مفيش غيرها اقعد فى البلد ما البلد دى احسن من غيرها ما هو برضة افترى مننا اننا عايزين الريس يتمم على كل عبارة قبل ما تتطلع ناقص كمان يأمنلنا الميكروباص قبل ما نركبة
الافكس من كدة كمان لما قطرين يطأشوا فى بعض والناس تموت الريس زنبوا اية ياجماعة حيقوم يشيل المححولجى ويقعد مكانة .. لأ الكلام دة مش مظبوط خالص وعيييب هو الراجل ريس والا محولجى
الناس كمان بتحملة ان هو السبب فى الامراض اللى بتجيلهم هوة السبب فى السرطان والسبب فى الفشل الكلوى والسبب فى فيروس سى وكمان بى وامراض الصدر عشان الدخان والسحابة السودة اللى بقالها سنين 80 مليون مصرى بما فيهم الوزرا ورئيسهم مش عارفين لها سبب ولا علاج خلاص الريس هو اللى حيعرف سببها وعلاجها .. طب دة كلام يعنى مثلا انا راجل صدرى تعبان ولو فكرت كتير شوية با نهج دة بسبب الريس واللا التلوث واللا السحابة السودا ام بسبب اهمالى وانى قعدت انفخ فى سجاير تلوث صدرى وما بطلتهاش الا لما الدكتور قالى بالمفتشر كدة انى عندى قصور فى الرئة ولو ما حافظتش عيها حيجيلى فشل رئوى .. يبقى العيب فيا واللا فى الريس
يا جماعة لازم نكون صرحا مع نفسنا لان الافترى حرام وارحموا عزيز قوم زل ومننساش انة راجل صاحب عيا برضة نيجى نتهمة اننا مش لاقيين ناكل طيب حيأكلنا منين يا جماعة ما احنا كتير برضة .. دة القطة بتاكل ولادها قوم هوة حيبقى مسئول يأكل 80 مليون واحد .. دة كلام يعقل برضة يا اصحاب الالباب
حقيقى انا نيابة عن كل مصرى باعتذر لهذا الرجل والرمز العظيم وباقوللة من قلب قلبى من جوة ..احنا اسفين يا ريس .. احنا اسفين على بهدلتك وبهدلة عيالك وانت فى السن دة ملعون ابو الشعب الجاحد اللى يعمل فى ابوة كدة وميرحمش سنة و مرضة و ضعفة
وبابعت رسالة للريس الجديد اللى جاى واقولة
جوعنا ..اظلمنا .. تاجر باحلام ولادنا .. غرقنا فى البحر لما يضيق رزقنا فى بلادنا .. دوس بجزمتك على بقنا عشان مانقولكش لأ .. اقتل ولادنا برصاصك .. شربنا مية المجارى .. اكلنا الزبالة وكل انت كافياراك .. سففنا التراب وخليك انت فى قصورك .. خلينا كورة يلعب بيها ولادك تقسيمة مع صحابهم .. ادبحنا وتاجر باشلاءنا .. بيعنا فى المزاد وهين كرامتنا .. اسرقنا .. انهبنا .. ادبحنا
احنا قلبنا طيب حنحبك ونبكى عليك ونقولك
احنا اسفين يا ريس


ليست هناك تعليقات:
إرسال تعليق